സയന്‍സ് പാര്‍ക്ക് ഡോ. എ.പി.ജെ.അബ്ദുല്‍ കലാം സ്മാരക ശാസ്ത്രസാങ്കേതിക കേന്ദ്രമായി മാറുന്നു
കണ്ണൂര്‍: ജില്ലാ പഞ്ചായത്തിനു കീഴില്‍ പ്രവര്‍ത്തിക്കുന്ന സയന്‍സ് പാര്‍ക്ക് ഡോ. എ.പി.ജെ.അബ്ദുല്‍ കലാം സ്മാരക ശാസ്ത്രസാങ്കേതിക കേന്ദ്രമായി മാറുന്നു. ഇതിന്റെ ഭാഗമായി നിരവധി നവീകരണപ്രവര്‍ത്തനങ്ങള്‍ നടത്താനുള്ള ശ്രമത്തിലാണ് ഭാരവാഹികള്‍. നിലവിലുള്ള പ്രദര്‍ശനവസ്തുക്കള്‍ നവീകരിക്കുന്നതിനുപുറമെ പുതിയവ സംഘടിപ്പിക്കാനും ആലോചിക്കുന്നുണ്ട്.
ഹൈസ്‌കൂള്‍ വിദ്യാര്‍ഥികള്‍ക്ക് കേരളത്തിലെ പ്രശസ്തരായ ശാസ്ത്രജ്ഞന്മാരുമായി സംവദിക്കാന്‍ യങ് സയിന്റിസ്റ്റ് അറ്റ് കണ്ണൂര്‍, പ്രൈമറി വിദ്യാര്‍ഥികള്‍ക്കായി കിഡ് സയന്റിസ്റ്റ് അറ്റ് കണ്ണൂര്‍ എന്ന പരിപാടിയും നടപ്പാക്കും. ശാസ്ത്രസാങ്കേതിക പരിസ്ഥിതി കൗണ്‍സിലിന്റെ സഹകരണത്തോടെയാണ് പരിപാടി.
കേന്ദ്രത്തിലെ ലൈബ്രറി വിപുലപ്പെടുത്തും. ശാസ്ത്രഗ്രന്ഥങ്ങള്‍ കൈവശമുള്ളവര്‍ക്ക് പുസ്തകങ്ങള്‍ സംഭാവനയായി നല്‍കാം. ശാസ്ത്രസ്ഥാപനങ്ങളില്‍ പ്രവര്‍ത്തിച്ചവര്‍, അധ്യാപകര്‍, മറ്റു ശാസ്ത്രസ്‌നേഹികള്‍ എന്നിവര്‍ക്ക് സയന്‍സ് പാര്‍ക്കുമായി ബന്ധപ്പെടാം.
No comments:
Post a Comment