സ്‌പോര്‍ട്‌സ് കൗണ്‍സില്‍ അവാര്‍ഡുകള്‍ക്ക് അപേക്ഷ ക്ഷണിച്ചു

2014 ലെ ജി.വി.രാജ അവാര്‍ഡ്, സുരേഷ്ബാബു മെമ്മോറിയല്‍ ലൈഫ് ടൈം അച്ചീവ്‌മെന്റ് അവാര്‍ഡുകള്‍ക്കും, മികച്ച കായിക പരിശീലകനും മികച്ച കായികാധ്യാപകനുമുള്ള അവാര്‍ഡുകള്‍ക്കും മികച്ച സ്‌കൂള്‍, മികച്ച കോളേജ് എന്നിവയ്ക്കുള്ള അവാര്‍ഡുകള്‍ക്കും മാധ്യമ അവാര്‍ഡുകള്‍ക്കും സ്റ്റേറ്റ് സ്‌പോര്‍ട്‌സ് കൗണ്‍സില്‍ അപേക്ഷ ക്ഷണിച്ചു. ജി.വി.രാജ അവാര്‍ഡ്: മൂന്നു ലക്ഷം രൂപയും, ഫലകവും, പ്രശസ്തി പത്രവും അടങ്ങുന്നതാണ് അവാര്‍ഡ്. പുരുഷ, വനിതാ വിഭാഗങ്ങളിലായി ഓരോ കായിക താരത്തെയാണ് അവാര്‍ഡിന് പരിഗണിക്കുന്നത്. അപേക്ഷകന്‍ 2010-11 മുതല്‍ 2013-14 വരെയുളള സാമ്പത്തിക വര്‍ഷകാലയളവില്‍ ഒളിമ്പിക്‌സ്, അംഗീകൃത വേള്‍ഡ് ചാമ്പ്യന്‍ഷിപ്പുകള്‍, ഏഷ്യന്‍ ഗെയിംസ്, അംഗീകൃത ഏഷ്യന്‍ ചാമ്പ്യന്‍ ചാമ്പ്യന്‍ഷിപ്പുകള്‍ (സീനിയര്‍ തലം), കോമണ്‍വെല്‍ത്ത് ഗെയിംസ് എന്നിവയില്‍ പങ്കെടുത്ത് മെഡലുകള്‍ കരസ്ഥമാക്കിയവരും നിലവില്‍ സജീവമായി കായികരംഗത്തുളളവരുമായിരിക്കണം. സ്വയം സാക്ഷ്യപ്പെടുത്തിയ സര്‍ട്ടിഫിക്കറ്റുകളുടെ പകര്‍പ്പുകള്‍ സഹിതം അപേക്ഷ നേരിട്ടും, ബന്ധപ്പെട്ട അസോസിയേഷന്‍ മുഖേനയും സമര്‍പ്പിക്കാം ജി.വി.രാജ അവാര്‍ഡ് മുന്‍കാലങ്ങളില്‍ ലഭിച്ചവര്‍ അപേക്ഷിക്കേണ്ടതില്ല. സുരേഷ്ബാബു മെമ്മോറിയല്‍ ലൈഫ് ടൈം അച്ചീവ്‌മെന്റ് അവാര്‍ഡ്: കേരള കായികരംഗത്തിന് മികച്ച സംഭാവനകള്‍ നല്‍കിയ വ്യക്തിക്ക് ആജീവനാന്ത കായിക നേട്ടങ്ങള്‍ പരിഗണിച്ച് നല്‍കുന്ന അവാര്‍ഡാണിത്. മൂന്നു ലക്ഷം രൂപയും ഫലകവും പ്രശസ്തി പത്രവും അടങ്ങുന്നതാണ് അവാര്‍ഡ്. അപേക്ഷ സ്വയം സാക്ഷ്യപ്പെടുത്തിയ സര്‍ട്ടിഫിക്കറ്റുകളുടെ പകര്‍പ്പുകള്‍ സഹിതം അപേക്ഷ നേരിട്ടും ബന്ധപ്പെട്ട അസോസിയേഷന്‍ മുഖേനയും സമര്‍പ്പിക്കാം. മികച്ച കായിക പരിശീലകന്‍ : കായികരംഗത്തെ പരിശീലന മികവിന്റെ അടിസ്ഥാനത്തിലാണ് അവാര്‍ഡിന് നല്‍കുന്നത്. കേരളത്തില്‍ സേവനം അനുഷ്ടിക്കുന്ന കായികതാരങ്ങള്‍ക്ക് പരിശീലനം നല്‍കുന്നവരെയാണ് പരിഗണിക്കുന്നത് അപേക്ഷകന്‍ തങ്ങളുടെ കഴിഞ്ഞ നാലു വര്‍ഷത്തെ (2011-12, 2014-15) പരിശീലന മികവിന്റെയും, പരിശീലനം നല്‍കിയ കായികതാരങ്ങളുടെ നേട്ടങ്ങളുടെയും വിശദവിവരം ഉള്‍പ്പെടുന്ന രേഖകള്‍ സഹിതം അപേക്ഷിക്കണം. മികച്ച കായികാധ്യാപകന്‍ : 2014- 15 അദ്ധ്യയന വര്‍ഷത്തില്‍ കായികരംഗത്ത് മികച്ച പ്രകടനം കാഴ്ചവച്ച സ്‌കൂള്‍, കോളേജുകളിലെ കായികാധ്യാപകര്‍ക്ക് കായിക നേട്ടത്തിന്റെയും, പരിശീലനമികവിന്റെയും അടിസ്ഥാനത്തില്‍ മികച്ച കായികാധ്യാപക അവാര്‍ഡിനായി അപേക്ഷിക്കാം. മികച്ച സ്‌കൂള്‍: 2014 -15 അദ്ധ്യയന വര്‍ഷത്തില്‍ മികച്ച കായികനേട്ടങ്ങള്‍ കരസ്ഥമാക്കിയ സ്‌കൂളിന് ഈ അവാര്‍ഡിന് അപേക്ഷിക്കാം. കായിക നേട്ടങ്ങളുടെ രേഖകളും അപേക്ഷയോടൊപ്പം സമര്‍പ്പിക്കണം. മികച്ച കോളേജ്: 2014- 15 അദ്ധ്യയന വര്‍ഷത്തില്‍ മികച്ച കായിക നേട്ടങ്ങള്‍ കരസ്ഥമാക്കിയ കോളേജിന് ഈ അവാര്‍ഡിന് അപേക്ഷിക്കാം. കായിക നേട്ടങ്ങളുടെ രേഖകള്‍ അപേക്ഷയോടൊപ്പം സമര്‍പ്പിക്കണം. മാധ്യമ അവാര്‍ഡുകള്‍: കേരളത്തിലെ അച്ചടി മാധ്യമങ്ങളിലെ ഏറ്റവും നല്ല സ്‌പോര്‍ട്‌സ് ലേഖകനും, സ്‌പോര്‍ട്‌സ് ഫോട്ടോഗ്രാഫര്‍ക്കും, കേരള കായിക രംഗത്തിന്റെ വികസനത്തിനുതകുന്ന പ്രത്യേക പരിപാടികള്‍ സംപ്രേക്ഷണം ചെയ്ത ദൃശ്യമാധ്യമത്തിനും, മികച്ച സ്‌പോര്‍ട്‌സ് പുസ്തകത്തിനുമാണ് അവാര്‍ഡ് നല്‍കുന്നത്. ഓരോ വിഭാഗത്തിലും 25,000 രൂപയും, ഫലകവും പ്രശംസാപത്രവും നല്‍കും. 2014 ജനുവരി ഒന്നു മുതല്‍ ഡിസംബര്‍ 31 വരെ പ്രസിദ്ധീകരിച്ച ലേഖനങ്ങളും, ചിത്രങ്ങളും, ഈ കാലയളവില്‍ കേരള കായികരംഗത്തിന്റെ വികസനത്തിനുതകുന്ന പ്രത്യേക പരിപാടികള്‍ സംപ്രേക്ഷണം ചെയ്ത ദൃശ്യ മാധ്യമ പരിപാടികളും, ഈ കാലയളവില്‍ പ്രസിദ്ധീകരിച്ച പുസ്തകങ്ങളും പുരസ്‌കാരത്തിന് പരിഗണിക്കും. ഒരാളില്‍ നിന്നും പരമാവധി രണ്ട് ലേഖനങ്ങളും, രണ്ട് ഫോട്ടോകളും, രണ്ട് സി.ഡി.കളും സ്വീകരിക്കും. പ്രത്യേക അപേക്ഷാഫോറം ഇല്ല. പൂര്‍ണമായ പേരും, മേല്‍വിലാസവും എഴുതിയ അപേക്ഷയോടൊപ്പം പ്രസിദ്ധീകരണത്തിന്റെ പേരും, തീയതിയും വ്യക്തമാക്കിയിരിക്കണം. അപേക്ഷ സെപ്തംബര്‍ 15 ന് മുന്‍പായി സെക്രട്ടറി, കേരള സ്റ്റേറ്റ് സ്‌പോര്‍ട്‌സ് കൗണ്‍സില്‍, തിരുവനന്തപുരം - 1 വിലാസത്തില്‍ സമര്‍പ്പിക്കണം. വെബ്‌സൈറ്റ്: www.sportscouncil.kerala.gov.in.