മനുഷ്യഹൃദയങ്ങളെ അടുപ്പിക്കാന് സാങ്കേതികവിദ്യ സഹായകമാകണം -ഡോ. ഖാദര് മാങ്ങാട്
കണ്ണൂര്: മനുഷ്യഹൃദയങ്ങളെ അടുപ്പിക്കാന് പ്രയോജനപ്പെടുത്തുമ്പോഴാണ് സാങ്കേതികവിദ്യയുടെ പുരോഗതി അര്ഥവത്താകുന്നതെന്ന് കണ്ണൂര് സര്വകലാശാലാ വൈസ് ചാന്സലര് ഡോ. ഖാദര് മാങ്ങാട് അഭിപ്രായപ്പെട്ടു. ഡിജിറ്റല് ഇന്ത്യ വാരാചരണത്തിന്റെ ഭാഗമായി കണ്ണൂര് കളക്ടറേറ്റില് നടന്ന ഡിജിറ്റല് എക്സ്പോയുടെ സമാപനസമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. കളക്ടര് പി.ബാലകിരണ് അധ്യക്ഷതവഹിച്ചു. ജില്ലാ ഇന്ഫര്മാറ്റിക്സ് ഓഫീസര് ആന്ഡ്രൂസ് വര്ഗീസ്, എന്.കെ.രത്നേഷ്, നൗഷാദ് പൂതപ്പാറ എന്നിവര് സംസാരിച്ചു. ഡിജിറ്റല് ഇന്ത്യയുടെ ഭാഗമായി നടപ്പാക്കുന്ന പുതിയ പദ്ധതികള് പരമാവധി പ്രയോജനപ്പെടുത്താനും പൊതുജനങ്ങളിലെത്തിക്കാനും അക്ഷയ സംരംഭകര്ക്ക് കഴിയണമെന്ന് കോമണ് സര്വീസ് സെന്റര് സംസ്ഥാന കോ-ഓര്ഡിനേറ്റര് കെ.പി.പത്മകുമാര് പറഞ്ഞു. സി.എസ്.സി. പദ്ധതികളുമായി ബന്ധപ്പെട്ട് അക്ഷയസംരംഭകര്ക്കായി സംഘടിപ്പിച്ച ബോധവത്കരണത്തില് സംസാരിക്കുകയായിരുന്നു അദ്ദേഹം.
എം.കൃഷി, ബസ്, റെയില്വേ ബുക്കിങ്, ടെലിമെഡിസിന്, പാസ്പോര്ട്ട് സേവനങ്ങള് തുടങ്ങിയവ വലിയ സാധ്യതകളാണ് തുറന്നുതരുന്നത്. ചുരുങ്ങിയ കാലത്തിനുള്ളില് രാജ്യവ്യാപകമായി നാഷണല് ഓപ്റ്റിക് ഫൈബര് നെറ്റ്വര്ക്ക് പൂര്ത്തിയാകുമെന്നും അദ്ദേഹം അറിയിച്ചു. ജില്ലാ പൊലീസ് മേധാവി പി.എന്.ഉണ്ണിരാജന് പരിപാടി ഉദ്ഘാടനം ചെയ്തു. ജില്ലാ ഇന്ഫര്മാറ്റിക്സ് ഓഫീസര് ആന്ഡ്രൂസ് വര്ഗീസ്, അക്ഷയ അസി.ജില്ലാ കോ ഓര്ഡിനേറ്റര് നൗഷാദ് പൂതപ്പാറ തുടങ്ങിയവര് സംബന്ധിച്ചു.
No comments:
Post a Comment